Kważi għaddew għaxar xhur minn meta f’Ottubru  2007 il-Laqgħa Ġenerali ta’ l-Għaqda ħatritni bħala Segretarju wara li Mario Dalli ma setax ikompli f’din il-kariga.  Hawnhekk nixtieq nirringrazzja lil Mario tax-xogħol fejjiedi li għamel tul dawn l-aħħar tmien snin li dam jokkupa din il-kariga.  Żgur li qeda dmiru b’lealtà u konvinzjoni lejn l-Għaqda u persważ li se jibqa’ jagħti kontribut minn barra kif fil-fatt diġa ghamel tul dawn l-aħħar xhur. Nirringrazzja wkoll lil Ivan Zammit li fil-kariga ta’ Assistant Segretarju tal-Għaqda hu spalla għalija u jagħti kontribut mill-aqwa biex is-Soċjetà timxi ’il quddiem. Grazzi ta’ kollox Ivan!

Il-preparamenti għall-festa jitolbu impenn tul s-sena kollha, u dan baqa’ jiġi muri matul l-aħħar xhur bid-diversi attivitajiet li ġew organizzati  speċjalment mill-Kummissjoni Żgħażagħ anki jekk konna għadna kif ħriġna minn festi speċjali li ġew organizzati s-sena ta’ qabel fl-okkazzjoni tal-50 sena mit-twaqqif ta’ l-Għaqda.  S’intendi l-festa titlob diversi spejjeż u għalhekk nagħmel appell lill-ammiraturi kollha ta’ din l-Għaqda sabiex bl-aħjar mod possibbli jagħtu dik dil-kontribuzzjoni żgħira jew kbira sabiex jittaffew ftit mill-ispejjeż li jsiru sabiex tiġi organizzata l-festa.

Il-jiem tal-festa għandhom ikunu żmien ta’ ferħ u ċelebrazzjoni immaterjali jekk intix ma’ ta’ l-ajkla jew ma ta’ l-iljun.  Matul dawn il-jiem isiru ħafna appelli sabiex ma nħallux il-pika ttellifna mill-ħbiberija li għandu jkollna lejn xulxin. Jien konvint li din l-ħbiberija teżisti bejn iż-żewġ kumitati tas-soċjetajiet li ħdima flimkien u  fejn kellna bżonn niġbdu ħabel wieħed, ma ħarisna lejn xejn u ġbidna ħabel wieħed.  Issa wasal ż-żmien ta’ aktar prova fejn din l-hbiberija inkattruha u insaħħuha.

Ghalhekk nappella lil kulħadd biex filwaqt li nieħdu pjaċir b’attivitajiet popolari li jsiru, flimkien inwarrbu l-insulti u t-tgħajjir  bla sens li jagħmlu biss diżunur lil min jgħidhom.

Minn qalbi nawgura li ngħixu din l-festa flimkien u li nagħmlu dak kollu possibbli  sabiex tkun esperjenza sabiħa u  li tgħinna nimxu fuq il-passi tal-Patrun San Pietru.

Martin Camilleri
Segretarju